मुंबई, ३१ ऑगस्ट (वार्ता.) - श्री गणेशाचे आगमन आणि विसर्जन यांसाठी पालिकेने संपूर्ण यंत्रणा तैनात केली आहे. या उत्सवासाठी पालिकेकडून १ सहस्त्र ५५४ कर्मचारी आणि २५८ अधिकारी यांची नियुक्ती करण्यात आली आहे, अशी माहिती मुंबई महापालिका आयुक्त सुबोध कुमार यांनी काल पत्रकार परिषदेत दिली. ते पुढे म्हणाले की, गिरगाव, दादर आणि जुहू चौपाटी यांसारख्या विसर्जनस्थळी मोठी यंत्रणा सिद्ध ठेवण्यात आली आहे. चौपाटीच्या वाळूतून श्री गणेशमूर्ती विसर्जनासाठी नेणे सुलभ व्हावे, यासाठी २३१ ‘स्टील प्लेट’ लावण्यात येत आहेत. तसेच यंदा विभागीय स्तरावर २२ ठिकाणी कृत्रिम तलावांची व्यवस्था करण्यात येणार आहे.
